Шинэ жилийн баярыг угтан Саппорогийн өмнөх талбайд өнөөдөр “Мөнгөн шинэ жил”-ийн хаалтын үйл ажиллагаа болж өндөрлөлөө.
Тус арга хэмжээг 12 дугаар сарын 21-ний өдрөөс эхлэн 11 хоног урлаг, соёлын арга хэмжээ, үйлдвэр эрхлэгчдийн бараа бүтээгдэхүүний худалдаа, төрийн байгууллагуудын үйл ажиллагаа, арга хэмжээ, хүүхдүүдийн дунд спорт тэмцээн, ивээн тэтгэгч байгууллагууд болон төрийн байгууллагуудын бэлгийг өвлийн өвгөн гардуулан өгсөн юм.
Өнөөдрийн арга хэмжээний үеэр иргэдийн дунд азын сугалаа явуулж бяцхан бэлэг барилаа. Мөн хүүхэд багачууд маань өвлийн өвөөгөөс бэлгээ гардан авсан юм. Мөн хүрэлцэн ирсэн иргэд маань сүлд модныхоо өмнө гэр бүл, найз нөхдийн хамт дурсгалт зургаа татуулсан юм.
Ийнхүү 2023 оны сүүлчийн өдрийн "Мөнгөн шинэ жил" арга хэмжээ өндөрлөлөө. Хэдхэн цагийн дараа бид хуучин оноо үдэж шинэ оноо угтан авах гэж байна. Шинэ он танд аз жаргал, ололт амжилтаар дүүрэн сайхан жил болно гэдэгт итгэлтэй байна.
 
Хүүхэд хамгааллын ажлын хүрээнд сурагчдыг аливаа эрсдэлээс урьдчилан сэргийлэх аюулгүй байдлыг хангах, гэр бүлийн гишүүнтэйгээ 2 минут үнэгүй ярих боломжийг олгох зорилгоор “ИТГЭЛТЭЙ УТАС”-ыг дүүргийн ерөнхий боловсролын 27 сургуулийн 31 байр, 2 дотуур байранд суурилуулахаар төлөвлөөд байна.
Өнөөдөр баянхошуу бүсийн 8 сургууль, жаргалант тосгоны 74, 121 дүгээр сургуулиуд, 2 дотуур байранд суурилууллаа. Итгэлтэй утсыг дүүргийн Иргэдийн Төлөөлөгчдийн хурлын эмэгтэйчүүдийн зөвлөлийн санаачилгаар Иргэдийн Төлөөлөгчдийн хурал, Засаг даргын Тамгын газар, Монголын цахилгаан холбоо хамтран суурилуулж байгаа юм.
Итгэлтэй утсаар сурагчид бүх сүлжээний дугаар руу гэр бүлийнхэн, эцэг эхтэйгээ 2 минут үнэгүй ярихаас гадна яаралтай тусламжийн 101, 102, 103, 105, 107, 108, 119 дугаарууд руу дуудлага хийх юм.
Итгэлтэй утас нь сард 2500 минутын ярианы эрхтэй бөгөөд 1250 хүүхэд дуудлага хийх боломжтой.
 
Сонгинохайрхан дүүргийн “Эрүүл мэндийн төв” мэс засал, гэмтлийн тасгаар үйл ажиллагаагаа нэмлээ. Дүүргийн “Эрүүл мэндийн төв” нь иргэдэд чанартай, хүртээмжтэй тусламж үйлчилгээг хүргэхийг зорин ажилладаг. Тиймээс шинээр мэс заслын тусламж үйлчилгээг өнөөдрөөс явуулж эхлээд байна. Ингэснээр дүүргийн иргэд лавлагаа шатлалын үйлчилгээг харьяа эмнэлгээсээ авах нөхцөл бүрдэж байна.
Мэс засал, гэмтлийн тасагт дараах төрлүүдээр мэс засал хийгдэнэ.
• Ерөнхий мэс засал
• Хэвлийн дурангийн мэс засал
• Бөөр шээсний замын нээлттэй мэс засал
• Бөөр шээсний замын хавдрын мэс засал
• Зүрх судасны мэс засал
• Бүдүүн шулуун гэдэсний мэс засал
• Бүдүүн шулуун гэдэсний хавдрын мэс засал
• Гэмтлийн зарим нэр төрлийн мэс засал
• Хэвлийн хөндийн яаралтай мэс засал
 
Сонгинохайрхан дүүргийн Толгойт бүсэд Нийслэлийн төсвийн хөрөнгө оруулалтаар “Ахмадын хөгжлийн төв”-ийг ашиглалтад оруулсан.
Тус төвд 4-5 ахмад түрээсийн төлбөр төлөхгүй гар урлал, эсгий, оёдлын үйл ажиллагаа явуулдаг. Эдгээр ахмадууд компани, болон иргэдээс захиалга авч өрхийн орлогоо нэмэгдүүлдэг юм. Оёдлын үйл ажиллагаа эрхэлдэг ахмадууд 2023 онд нийт 20 гаруй иргэнд үнэ төлбөргүй гар урлалын чиглэлээр сургалт явуулсан байна.
Ахмадын хөгжлийн төвд чөлөөт цагаа өнгөрүүлэх, бие бялдраа чийрэгжүүлэх, уламжлалт бариа заслын эмчилгээ хийлгэх боломжтой өрөөнүүдтэй. Тодруулбал, дүүргийн дөрвөн бүсийн ахмадуудын биеийн тамир чийрэгжүүлэх дасгал хөдөлгөөн, шатар даам, шагай харваа, дартсын сургалт, нийтийн цэнгээнт бүжиг хуваарийн дагуу явагддаг байна. 2023 онд ахмадын хөгжлийн төвөөр давхардсан тоогоор нийт 5500 гаруй ахмадууд үйлчлүүлж, чөлөөлт цагаа зөв боловсон өнгөрүүлсэн байна.
 
Хөдөлмөр эрхлэлтийг дэмжих хөтөлбөрийн хүрээнд хүнд машин механизмын операторчин мэргэжлээр сургаж, ажлын байраар хангах “МЭРГЭЖИЛТЭЙ, АЖИЛТАЙ ЗАЛУУС” төслийг Сонгинохайрхан дүүрэг хэрэгжүүлж эхэллээ.
Уг төслийн зорилго нь Сонгинохайрхан дүүргийн 43 хорооны ажил, мэргэжилгүй залуусыг мэргэжлийн сургалтад хамруулж үнэмлэхтэй болгох цаашлаад ажлын байраар бүрэн хангах нөхцөлийг бүрдүүлэх юм.
Өнөөдөр төслийн нээлтийн үйл ажиллагаа Техник технологийн политехник коллеж дээр болж, Техник технологийн политехник коллежийн захирал Ц.Баярмаа, дүүргийн бусад холбогдох удирдлагууд, ажлын байраар хангах “KH” майнинг компани, “Эм Жи Эл Акуа” ХХК-ын менежерүүдийн хамт оролцсон.
 
Төсөлд хамрагдах залуусыг дүүргийн Засаг даргын Тамгын газар, Хөдөлмөр халамжийн үйлчилгээний хэлтэс, дүүргийн ажил олгогч байгууллагуудын төлөөллүүдийн бүрэлдэхүүнтэй ажлын хэсэг байгуулан, 80 хүнээс ярилцлага хийх замаар 43 суралцагчийг сонгон шалгаруулж авсан юм.
Эдгээр суралцагчид сургалтаа төгссөний дараа ажлын байранд шууд хамрагдах бөгөөд дүүрэгтэй “KА” майнинг, “Эм Жи Эл Акуа” ХХК-иуд хамтран ажиллаж байна.
Сонгинохайрхан дүүрэг 2022-2024 онд “Хөдөлмөр эрхлэлтийг дэмжих төсөл” хөтөлбөрийг боловсруулж, хэрэгжүүлж байна. Энэхүү төсөл ирэх 2024 онд үргэлжлэх бөгөөд мөн адил 43 хороодоос иргэдийг сонгон шалгаруулж мэргэжлийн сургалтад хамруулна. Ирэх оны төсөлд эмэгтэйчүүд рүү чиглэсэн үйл ажиллагааг зохион байгуулна.
 
Дүүргийн ТЦҮ ОНӨААТГ-т хог хаягдлын менежментийг сайжруулах ажлын хүрээнд дүүргийн төсвийн хөрөнгөөр давс, бодис цацах олон үйлдэлт автомашиныг гардуулан өгөв.
Мөн “Тохижилт цэвэрлэгээ үйлчилгээ” ОНӨААТҮГазарт дүүргийн төсвийн хөрөнгөөр 2020 оноос өнөөдрийг хүртэл ОХУ-ын “Камаз” маркийн өөрөө буулгагчтай гэр хорооллын хог хаягдлыг ачих зориулалттай задгай тэвштэй таван автомашин, орон сууцны хог хаягдлыг ачих зориулалттай шахдаг төхөөрөмжтэй гурав нийт 9 автомашинаар парк шинэчлэлийг нэмэгдүүлээд байна.
Цаашид хог тээвэрлэлтийн байгууллагын парк шинэчлэлтийг шат дараатай хийхээр төлөвлөөд байна.
 
Сонгинохайрхан дүүргийн Засаг даргын баталсан “Ёс зүйн зөрчилгүй хамт олон 2023 ” аяны удирдамжийн хүрээнд “Төрийн байгууллага, албан хаагчийг хууль тогтоомжоор хүлээсэн чиг үүргээ хэрэгжүүлэхдээ ёс зүйн хэм хэмжээг чандлан биелүүлэх, авлигаас урьдчилан сэргийлэх, эрсдэлийг тодорхойлох, хүнд суртлыг бууруулах, шалтгаан нөхцөлийг тодорхойлох нь” сэдэвт хэлэлцүүлгийг амжилттай зохион байгууллаа.
Хэлэлцүүлэгт дүүргийн Засаг даргын эрхлэх асуудлын хүрээний харьяа нийт 25 байгууллагын 2410 төрийн албан хаагчдыг төлөөлж 100 гаруй албан хаагч оролцож 2 чиглүүлэх илтгэл сонсож, асуулт хариулт, санал, зөвлөмж хэллээ.
Хэлэлцүүлгээс гаргасан зөвлөмжийг төрийн байгууллагуудад хүргүүлэн, үйл ажиллагаандаа хэрэгжүүлж, үр дүнд хүрч ажиллахаар боллоо.
Өнөөдөр Нийслэлийн удирдах ажилтны шуурхай зөвлөгөөн болсны дараа дүүргийн удирдах ажилтны шуурхай хурлыг удирдан зохион явууллаа. Хурлын эхэнд цас орж халтиргаа, гулгаа ихэссэнтэй холбоотойгоор өвөлжилтийн бэлтгэл ажлын хүрээнд хот, нийтийн аж ахуйн чиглэлээр үйл ажиллагаа явуулж байгаа байгууллагуудын машин, тоног, төхөөрөмжийн бэлэн байдлыг шалгаж, нарийвчилсан тоон судалгааг яаралтай гаргаж танилцуулахыг холбогдох албаныханд өглөө.
Мөн дүүргийн хэмжээнд өвөлжилтийн бэлтгэл ажил 93 хувьтай, 744,5 тонн давс, 387,8 тонн бодис нөөцлөөд байгаа юм.
Түүнчлэн томуу, томуут бус өвчний улирал ирж байгаатай холбогдуулан дүүргийн эмнэлгүүд бэлэн байдлаа хангаж нэмж шинээр ор, хөнжил, гудас худалдан авах ажиллагааг зохион байгуулахыг даалгалаа.
 
Сонгинохайрхан дүүргийн хувьд хог хаягдлын менежментийг сайжруулах, хог хаягдлын тухай хуулийн хэрэгжилтийг хангах, орчны бохирдлыг бууруулах, хөрсөнд дарж булагдах хогны хэмжээг багасгах зорилгоор Хог хаягдлыг эх үүсвэр дээр нь ангилан ялгах ажлыг үе шаттайгаар хэрэгжүүлж байна.
Дүүргийн 2, 3 дугаар хороонд 2021 оноос эхлэн 500 айлын хогийг ангилан ялган авах зориулалтын савыг байршуулан хуваарийн дагуу тээвэрлэн авч байгаа. Үүний үргэлжлэл болох дүүргийн 4 бүсэд дахивар авах цэгийг байгуулж байна. Үүний үр дүнд аж ахуйн нэгж байгууллагууд, иргэдийн ангилсан дахивар нөөцийг дахин ашиглах, дахин боловсруулах боломж нөхцөлийг бүрдүүлж байна.
Өнөөдрийн хувьд дүүргийн төсвийн санхүүжилтээр Хог хаягдлыг эх үүсвэр дээр нь ангилан ялгах стандартын жишиг хогийн савыг 43 хороо тус бүрт нийт 129 ширхэгийг гардуулж өглөө.
Ингэснээр иргэд хогоо ангилан ялгах дадал хэвшилд суралцах, хөрсөнд дарж булагдах хогны хэмжээг бууруулах зорилтыг тавин ажиллаж байна.
Тус цэгүүд дээр цугларсан ангилан ялгасан хоёрдогч түүхий эдийг “Түвшин Сайхан мөнх” НҮТББ-тай хамтран авахаар ажиллаж байна. Энэ байгууллага нь хоёрдогч түүхий эд худалдан аваад 14 жил болсон туршлагатай.
 
Сонгинохайрхан дүүргийн Засаг даргын Тамгын газар, Монгол Улсын ШУА-н Газарзүй, Геоэкологийн хүрээлэнтэй хамтран өнөөдөр /2023.09.26/ халиа, тошин, шар усны үер, үерийн эрсдэлээс урьдчилан сэргийлэх уулзалт, зөвлөгөөнийг зохион байгууллаа.
Тус зөвлөгөөний гол зорилго үерийн нарийвчилсан үнэлээг гаргах, дүүргийн ундны усны чанар, найрлага, гадаргын усны бохирдол, усны нөөц, үерийн ус, хөв, цөөрөм байгуулах асуудал, хөрсний бохирдлыг бууруулах арга зам түүн дээр суурилан авч хэрэгжүүлэх менежментийн ажлуудыг нэг бүрчлэн богино, дунд, урт хугацаандаа төлөвлөхөд оршиж байна.
Монгол Улсын Газарзүй, Геоэкологийн хүрээлэнгээс Сонгинохайрхан дүүргийн ундны усны чанарын судалгааг 43 хорооны ус хангамжийн эх үүсвэрийн 478 уст цэгээс усны сорьц авч, өнөөдөр судалгааны үр дүнгээ танилцуулсан юм. Мөн үерийн усны аюулаас урьдчилан сэргийлэхийн тулд гол усны ай сав дээр усны нөөц, үерийн ус, хөв, цөөрөм байгуулах, үерийн далан суваг хийх судалгааг гаргах, үерийн аман дээр буусан айл өрхүүдийг нүүлгэх, хөрсний бохирдолыг хэрхэн шийдвэрлэх зэрэг эрдэм шинжилгээний судалгаан дээр суурилсан мэдээ, мэдээллийг авсан зөвлөгөөн боллоо.
Харин Сонгинохайрхан дүүргийн хувьд өнөөдрийн байдлаар 19,6 км үерийн далан байгаа бол цаашид 44 км хийх нэн шаардлагатай гэдэг судалгаа бий. Мөн дүүргийн хэмжээнд 56 мянган нүхэн жорлон байдаг бөгөөд “Хөрсний бохирдолгүй дүүрэг” хөтөлбөрийн хүрээнд 2021- 2024 онд 10 мянган нүхэн нойлыг эко болгох зорилтыг тавин ажиллаж байна. Өнөөдрийн байдлаар 6700 айлын нойлыг эко болгосон бөгөөд ирэх онд үлдсэн 3300 айлын нойлыг сольж дуусах юм. Эдгээр өрх бүр хашаандаа 10 мод тарьж байгаа бөгөөд нийт 60 мянга гаруй мод гэр хороолол дунд таригдсан байх юм. Энэ манай дүүргийн хувьд урт хугацааны бодлого болон хэрэгжиж байна.
Аливаа зүйл шинжлэх ухаан дээр суурилан хөгжих нь илүү үр дүнтэй. Тиймээс Сонгинохайрхан дүүрэг цаашид Газарзүй, Геоэкологийн хүрээлэнгийн газартай хамтран судалгаа шинжилгээ хийж, үерийн эрсдэлтэй бүсийг тодорхойлох, үерийн далан, усны сав, хөв, цөөрөм, цэцэрлэгт хүрээлэн байгуулах ажлын судлагааг хамтарч гарган, цаашид хамтын ажиллагаагаа улам өргөжүүлэн ажиллахаар боллоо.