Дэлхийн олон улсад тархаж байгаа коронавирусын халдвараас урьчилсан сэргийлэх зорилгоор Нийслэлийн Засаг дарга захирамж гаргаж 2020 оны 04 сарын 30-ны өдрийг хүртэл  нийслэлийн хэмжээнд үйл ажиллагаа явуулж байгаа бүх төрлийн баар, караоке, амралт сувиллын газар, бялдаржуулах төв,  саун, сургалтын төвийн үйл ажиллагааг түр зогсоосон.

Тэгвэл өчигдөр /2020.04.16/ Монгол Улсын Засгийн газраас нийслэлд ирүүлсэн амралтын газар, фитнесс заал, сауны  үйл ажиллагааг нээх чиглэлийн хүрээнд НОК-ын Шуурхай ажлын хэсэг хуралдаж, иргэд, аж ахуйн нэгжүүдээс ирүүлсэн хүсэлт, холбогдох судалгаа тооцоо, тоон баримтанд үндэслэн хэлэлцсэн.

Хэдийгээр коронавирусын тархалтаас урьчилсан сэргийлэх ажил нийслэлийн хэмжээнд хэрэгжиж байгаа ч олон хүн нэг дор төвлөрөхөөс урьчилан сэргийлэх, улс, нийслэлийн эдийн засгийг сэргээх, хувийн хэвшлийнхэний үйл ажиллагааг дэмжих, иргэдийг гэр бүлээрээ агаар салхинд гарах боломжийг бүрдүүлэх, Монгол Улсын Засгийн газраас өгсөн үүрэг чиглэлийг хэрэгжүүлэх зорилгоор Нийслэлийн Засаг дарга бөгөөд Улаанбаатар хотын захирагч С.Амарсайхан өнөөдөр А/521 тоот “Иргэдийн эрүүл мэндийн талаар авах зарим арга хэмжээний тухай” захирамж гаргаж нийслэлийн нутаг дэвсгэр дээр стандартын шаардлага хангах хэмжээнд үйл ажиллагаага явуулж байгаа амралтын газар, аялал жуулчлалын бааз, саун, буудал, бялдаржуулах төв /фитнесс/, иогийн клуб, цөөн хүнтэй сургалтын төвийн үйл ажиллагааг нээлээ.

Эдгээр байгууллагууд үйл ажиллагаа нээж, явуулахдаа үйлчлүүлэгчийн биеийн халууныг хэмжиж дотогш нэвтрүүлэх, ариутгал халдваргүйжүүлэлтийг хоёр цаг тутамд гүйцэтгэж байх, иргэдийг нэг дор олноор цуглуулахгүй байх, мэргэжлийн байгууллагын зөвлөмж зөвлөгөөг хэрэгжүүлэх үүрэг хүлээн ажиллахыг Хотын дарга захирамждаа дурьджээ.

 Нийслэлийн ЗДТГ-ын Хэвлэл мэдээлэлтэй харилцах хэлтэс

Улсын онцгой комиссоос их дээд болон ерөнхий боловсролын сургууль, цэцэрлэгийн үйл ажиллагааг есдүгээр сарын 1 хүртэл хойшлуулж байна. Гэхдээ зургадугаар сарын 1 хүртэл теле хичээл үргэлжилнэ.

ЕБС-ийн жилийн эцсийн дүнг хоёрдугаар улирлын дүнгээр тооцож анги дэвшүүлнэ. Хүүхдүүдийг улираахгүй. Цэцэрлэг болон нэгдүгээр ангийн бүртгэлийг наймдугаар сарын хоёрдугаар хагаст зохион байгуулна. Үүнтэй холбоотойгоор дөрөвдүгээр сарын 15-аас аймаг нийслэлийн Засаг дарга нарт сургууль цэцэрлэгийн танхимын тог цахилгааныг хязгаарлах чиглэл өгсөн.

ЭЕШ-ын хугацаа хуваарийг одоогийн байдлаар долдугаар сарын 2-5-ны өдрүүдэд зохион байгуулаад долдугаар сарын 8-9 их дээд сургууль элсэлтээ авна гэж төлөвлөсөн хэвээр байна. ЭЕШ өгөх бүх хүүхэд монгол хэл бичгийн шалгалт өгсөн байх Ерөнхийлөгчийн зарлигтай.

Гэвч энэ жил энэ шалгалтыг авахгүй, өнжинө. Ингэснээр бүх хүүхэд ЭЕШ өгөх боломжтой гэсэн үг. Есдүгээр ангийн улаан шугам энэ жил үйлчлэхгүй. Өндөр төлбөртэй хувийн сургууль, цэцэрлэгийн төлбөрийн хувьд сургуулийн удирдлагууд эцэг эхчүүдтэй санал бодлыг солилцож байгаа. Яамны зүгээс хувийн сургуулийн төлбөрийн асуудалд оролцох чиг үүрэг байхгүй.

Эрүүл мэндийн яам коронавирусийн халдварын талаарх ээлжит мэдээллээ хийлээ. ХӨСҮТ-ийн мэдээлснээр 2020 оны дөрөвдүгээр сарын 13-ны өдрийн байдлаар коронавирусийн халдвар авсан нийт таван хүн эдгэж, эмнэлгээс гарчээ.

Харин гаднаас зөөвөрлөгдсөн өвчлөлийн тоо нэмэгдсээр байна. Тодруулбал, ХӨСҮТ-ийн лабораторит нийт 502 хүнд хийсэн шинжилгээний хариу гарчээ. Үүнээс Сөүл-УБ чиглэлийн тусгай үүргийн нислэгээр ирж тусгаарлагдсан 260 хүний хариу сөрөг гарсан бол тандалт судалгааны зорилгоор уушгины хатгалгаагаар өвдсөн 19 хүний шинжилгээний хариу сөрөг гарчээ. ХӨСҮТ-д тусгаарлагдсан 17 хүнээс гадна ОХУ-аас ирж тусгаарлагдсан 149, Дархан-Уул аймагт тусгаарлагдсан 44 хүнд хийсэн шинжилгээний хариу өчигдөр гарч 13 тохиолдол батлагдлаа.

ОХУ-аас ирсэн 282 зорчигч нь Москва-Улаан Үд рүү нислэг үйлдсэн, Эрхүү-Улаан-Үд рүү ирж, хилээр орж иржээ. Москва-Улаан-Үд рүү ирсэн зорчигчдыг Амар зочид буудалд байрлуулжээ. Дархан-Уул аймагт 110 хүнийг тусгаарлаж, батлагдсан нэг тохиолдол нь Москвагийн Төмөр замын дээд сургуульд сурдаг байжээ. Батлагдсан тохиолдлуудын мэдээллээр тухайн сургуульд халдвар бүртгэгдсэн байна. Коронавирусийн халдвар илэрсэн иргэний ойрын хавьтал болох 30 хүн Москвад сурч байсан оюутнууд аж. ХӨСҮТ-ийн захирал Д.Нямхүүгийн мэдээлснээр Дархан-Уул аймагт тусгаарлагдаж, батлагдсан нэг тохиолдлыг Улаанбаатарт шилжүүлэн ХӨСҮТ-д тусгаарлан байрлуулж, эмчилж байгаа аж.

Нэмэгдсэн өртгийн албан татварын буцаан олголтыг 2020 оноос эхлэн улирал бүрт олгохоор болсон билээ.

Уг өөрчлөлтийн дагуу энэ оны нэгдүгээр улирлын буцаан олголт дөрөвдүгээр сард иргэдийн дансанд шилжүүлэх ёстой. Энэ талаар мэдээллийг Татварын ерөнхий газрын Тасгийн дарга Ц.Эрдэнэхүүгээс тодруулав.

Тэрбээр "Урьдчилсан байдлаар 869,000 иргэнд 35.8 тэрбум төгрөгийг буцаан олгох тооцоололтой байгаа. Одоогоор иргэдийн бүртгүүлсэн баримтуудыг Татварын ерөнхий газрын цахим системээр хянаж байна. Хуулийн хугацаанд буюу дөрөвдүгээр сарын 20-ны дотор НӨАТ-ын буцаан олголтыг иргэдийн бүртгэлтэй дансанд нь шилжүүлнэ" гэлээ.

2020 оны нэгдүгээр улиралд нэг иргэн дунджаар 47,000 төгрөгийн буцаан олголтыг авна хэмээн Сангийн сайд Ч.Хүрэлбаатар мэдээлж байв.

НӨАТ-ын хоёрдугаар улирлын буцаан олголтыг долдугаар сард,

гуравдугаар улирлын буцаан олголтыг аравдугаар сард,

дөрөвдүгээр улирлын буцаан олголтыг дараа оны нэгдүгээр сард багтаан иргэдэд олгоно.

 

 

 

                                                                                               

Нийслэлийн ИТХ-ын Төлөөлөгч Б.Отгонсүх Сонгинохайрхан дүүргийн нутаг дэвсгэрийн дөрвөн га газарт цэцэрлэгт хүрээлэн барих ажлыг санаачлан, өдгөө ажил хэрэг болгоод байна.

Тодруулбал, Улаанбаатар хотын хамгийн том цэцэрлэгт хүрээлэн Сонгинохайрхан дүүрэгт барьж буй юм. Одоогоор цэцэрлэгт хүрээлэнгийн хашаа, явган хүний замын тохижилтын ажлыг хийж байгаа бөгөөд энэ зун бүрэн ашиглалтад оруулахаар төлөвлөжээ.

                                                                                                    

Уг цэцэрлэгт хүрээлэнд мод тарих ногоон байгууламжийн ажилд сайн дураараа оролцох иргэдтэй хамтран ажиллахад нээлттэй гэдгийг Нийслэлийн ИТХ-ын Төлөөлөгч Б.Отгонсүх онцоллоо.

Өндөржүүлсэн бэлэн байдалд ажиллаж буй төрийн албан хаагчдын сэтгэл зүйг дэмжих, оновчтой шийдвэр гаргаж асуудлыг давж гарахад туслах, хамтын ажиллагааг нэмэгдүүлэх зорилгоор “Хүнд нөхцөлд стрессээ хэрхэн удирдах вэ” сэдвийн хүрээнд цахим сургалтыг 2020 оны 04 дүгээр сарын 10-ны өдөр “Дэйл карнеги Монгол” сургалтын байгууллагатай хамтран дүүргийн хэмжээнд зохион байгууллаа.

Сургалтад дүүргийн Засаг даргын эрхлэх асуудлын хүрээний харьяа байгууллага, сургууль, цэцэрлэг, Тамгын газар болон хороодын нийт 760 гаруй албан хаагчдыг хамруулахаар зохион байгуулалтын арга хэмжээ авч, 360 гаруй албан хаагч хамрагдлаа. Сургалтад оролцсон албан хаагчдын зүгээс цаашид ийм хэлбэрийн сургалт дахин зохион байгуулах нь зүйтэй гэсэн санал сэтгэгдэлийг сургалтын төгсгөлд нилээд хэлж байсан юм.

Нийслэлийн Онцгой комисс өнөөдөр цахимаар хуралдлаа. Хуралдааны эхэнд нийслэлийн Эрүүл мэндийн газрын дарга Ш.Төмөрбаатар дэлхийн олон улсад тархаад буй COVID-19 халдварын цар тахалт болон урьдчилан сэргийлэх хүрээнд авч хэрэгжүүлж буй арга хэмжээний талаар мэдээлэл хүргэлээ. Тэрбээр гадаадаас зөөвөрлөгдөн ирсэн зарим иргэдийн мэдээлэл будилантай утас хаягаа буруу өгсөнөөс үүдэж хугацаа алдаж хяналтад орох, гэрийн тусгаарлалтын дэглэмийг зөрчих зэрэг эрсдэл үүсгэж болзошгүй үйлдлүүд гарч байгааг дуулгаад тусгаарлалтын журмыг зөрчсөн иргэдэд хариуцлага хүлээлгэж олон нийтэд зарлах, иргэдэд чиглэсэн заавар зөвлөгөөг сайтар өгч ажиллах шаардлагатай байгааг хэлсэн юм.

Хэлэлцэж буй асуудалтай холбогдуулан нийслэлийн Багануур, Налайх дүүргийн Засаг дарга нар санал хэлэв. Тэд хэлэхдээ, Зуслангийн болон аялал жуулчлалын ногоон бүсэд иргэд ууланд алхах, гэр бүлээр агаарт гарах нэрийдлээр гал алдах үзэгдэл цөөнгүй байгаа учраас ногоон бүсэд гарах асуудлыг түр хойшлуулах санал гаргаж байв.

Нийслэлийн Засаг дарга бөгөөд Улаанбаатар хотын Захирагч С.Амарсайхан дэлхийн нийтэд тархаад буй COVID-19 халдвараас урьдчилан сэргийлэх хүрээнд олон нийтийн гудамж талбайд ил задгай бие засахгүй, нус шүлсээ хаяхгүй байх, тоглоомын талбайд хүүхэд багачуудыг олноор цуглуулахгүй байх зэрэг асуудлуудад хяналт тавьж ажиллахыг эргүүлээр ажиллаж буй нутгийн захиргааны байгууллагын албан хаагчдад үүрэг болголоо.

Мөн НОБГ, НЭМГ, НМХГ болон Цагдаагийн удирдах газрын удирдлагуудад коронавирусийн халдвараас урьдчилан сэргийлэх арга хэмжээг эрчимжүүлж шинэчилсэн төлөвлөгөөг батлуулж ажиллах хэрэгтэйг санууллаа. Нийслэлийн хэмжээнд  хороо дүүргийн хэсгийн ахлагч нарыг олон нийтийн байцаагчийн  хууль ёсны эрх үүрэгтэйгээр ажиллуулах болсон, тэд Зөрчлийн хуулийн дагуу иргэдийн зүй зохисгүй үйлдэлд хяналт тавих, торгууль шийтгэл оногдуулах эрхтэй  болж байгаа нь иргэдийг ая тухтай амьдрах орчин нөхцөлийг бүрдүүлэхийн төлөө хэрэгжүүлж байгаа үйл хэрэг болохыг олон нийтэд таниулах, бэлтгэл ажлыг хангахыг холбогдох албан тушаалтнуудад чиглэл болголоо.

Иргэдийг амны хаалт хэрэглэж хэвшүүлэх, халдвараас урьдчилан сэргийлэх хүрээнд зөвлөмж мэдээлэл хүргэж ажиллахыг нийслэлийн Эрүүл мэндийн газар болон НЗДТГ-ын Хэвлэл мэдээлэлтэй харилцах хэлтсийн удирдлагуудад өгөв. Дөрөв болон тавдугаар саруудад халдварын тархалт нэмэгдэх төлөвтэй байгаа талаар ДЭМБ-аас сануулж олон улсад урьдчилан сэргийлэх арга хэмжээг чангатгаж байгаа учраас Монгол Улсын хувьд хяналтаа сулруулж  болохгүй гэдгийг хотын Захирагч С.Амарсайхан дахин сануулсан юм.

Сургуулийн цэцэрлэгийн үйл ажиллагааг 9 дүгээр сарын 1-ны өдөр хүртэл хаах Засгийн газрын чиглэл гарсантай холбогдуулан ЕБС-ын болон их дээд сургуулийн төгсөлтийн шалгалтыг эрүүл мэндийн байгууллагаас гаргасан заавар зөвлөмжийн дагуу цахим хэлбэрээр зохион байгуулж, хяналт тавихыг нийслэлийн Боловсролын газарт мөн үүрэг болголоо.

Түүнчлэн нийслэлийн ногоон бүсэд ой хээрийн түймэр гарахаас сэргийлж, байгал хамгаалагч нарын ажлыг эрчимжүүлж эргүүл хяналтын ажлыг тогтмол зохион байгуулахыг холбогдох албаныханд үүрэг өгсөн юм.

Засаг даргын дэргэдэх Орон тооны бус зөвлөлийн шийдвэрээр худалдан борлуулалт хийхээр болсон бараа бүтээгдэхүүнийг худалдан борлуулах тул сонгон шалгаруулалтад оролцох аж ахуйн нэгж байгууллагууд 70171239 дугаараар холбогдож мэдээлэл авна уу.