Дүүргийн Засаг даргын А/556 дугаар захирамжаар дүүргийн шуурхай штаб  28 дахь өдрөө үргэлжлэн ажиллаж байна. Мэргэжлийн хяналтын хэлтэс, Онцгой байдлын хэлтэс, Цагдаагийн хэлтэстэй жижүүрлэн ажиллаж, гэр хорооллын 35 хорооны 226 хэсгийн 1834 айл өрхөд 1112 зөвлөмжийг  дахин давтан хүргэсэн байна.

Дүүргийн хэмжээнд 12 дундын төв ажиллахаас 5 дундын төв, 125 борлуулалтын цэг ажиллахаас 95 борлуулалтын цэг ажиллаж байна. Бусад цэгүүдэд Таван толгой түлш хангалт хийхгүйгээс иргэд маш их бухимдалтай байна.

Эмэгтэйчүүдийн нийгмийн оролцоог дээшлүүлэх, тэдний нийгмийн баталгааг хангах, манлайллыг нэмэгдүүлэх зорилгоор “Эмэгтэйчүүдийн оролцоо нийгэмд” чуулганыг  зохион байгууллаа. Тус чуулганд дүүргээс сонгогдсон УИХ-ын гишүүн Ц.Гарамжав, Б.Ундармаа, Н.Учрал болон НИТХ-ын Төлөөлөгч Д.Баярсайхан нар уригдан оролцлоо. Чуулганаар дүүргийн салбар салбартаа тэргүүлэгч 9 эмэгтэйг шалгаруулж, ур ухаан, авьяас чадварыг нь алдаршууллаа.

Дүүргийн удирдах ажилтнуудын шуурхай хуралдаан боллоо. Хүйтний эрч чангарч байгаатай холбогдуулан томуу, томуу төст өвчнөөс урьдчилан сэргийлэх, сайжруулсан түлшний хэрэглээнд хяналт тавих, зөв хэрэглээний талаар иргэдэд мэдээлэл хүргэх зэрэг үүргийг холбогдох газруудад өглөө.

Худалдаа үйлчилгээний чиглэлээр үйл ажиллагаа явуулж буй иргэн, аж ахуйн нэгжийн удирдлагуудтай уулзаж, цаашдын чиг хандлагын талаар санал солилцож байна.Худалдааны байгууллагууд дагаж мөрдөх журам стандарт болон бусад зүйл дээр шинэчлэл хийх, бусдынхаа хэрэгжүүлсэн сайн жишгээс туршлага судлах зэрэг олон асуудлыг ярилцаж байна.

    Дүүргийн 23 дугаар хороонд сургуулийн насны 2500 хүүхэд оршин суудаг бөгөөд төрийн өмчит болон хувийн сургууль байхгүйгээс хүүхдүүд өөр дүүрэг, хорооны сургуульд сурдаг байсан.

143-р сургууль ашиглалтад орсноор нэмэлт хүчин чадлаар 1000 гаруй хүүхэд ая тухтай орчинд, өөрийн харьяа хороондоо сурч боловсрох таатай нөхцөл бүрдлээ.

Сургуулийн барилгын ажилд Нийслэлийн Хөрөнгө Оруулалтын газраас захиалагчийн техникийн хяналт тавин, байнгын ашиглалтад оруулах комисс ажиллаж, гүйцэтгэгч байгууллагаар "Хүрэл Ордон" ХХК ажилласан байна.

Дүүргийн нэгдсэн эмнэлэг ханиад томуу ихсэж ачаалал ихсэхээс урьдчилан сэргийлж 80 орыг нэмэлтээр гаргаад байна. Ингэснээр тус эмнэлэг 245 хүүхэд хэвтэн эмчлүүлэх боломжтой болж байгаа бөгөөд өмнөх жилийхээс ачаалал 60 хувиар буурна гэж тооцоолж байна.

Засаг даргын орлогч Нийгмийн салбарын төслүүдийн удирдагч Д.Ундармаа Нэгдсэн эмнэлгийн нөхцөл байдалтай танилцлаа. Хүйтний улирал ирж байгаатай холбогдуулан ханиад томуунаас урьдчилан сэргийлэхийг анхааруулж байна. 

Гадаад сургууль төгссөн залуучуудыг эх орондоо хөдөлмөр эрхлэхэд нь дэмжлэг үзүүлэх зорилготойгоор “Карьер Экспо-2019” хөдөлмөрийн яармагийг зохион байгуулах гэж байна. Тус хөдөлмөрийн яармаг үзэсгэлэнг Хөдөлмөр нийгмийн хамгааллын яам, нийслэлийн Хүүхэд залуучуудын хөгжлийн газар, нийслэлийн Хөдөлөмөр эрхлэлтийн газар, “Гадаадад төгсөгчдийн нэгдсэн зөвлөл” хамтран зохион байгуулах бөгөөд  өнөөдөр нийслэлийн ЗДТГ-ын Хэвлэлийн мэдээллийн төвд сэтгүүлчдэд мэдээлэл өглөө.

Өнгөрөгч онд зохиогдсон “Эх орондоо хөдөлмөр эрхэлцгээе” уриатай хөдөлмөрийн үзэсгэлэн яармагт 1100 гаруй гадаадад сургууль төгссөн мэргэжилтэй залуус хамрагдаж, 510 орчим залуус сонирхсон ажлын байранд бүртгүүлснээс 70 залуу шууд ажилд орсон байна.

Энэ жилийн хөдөлмөрийн үзэсгэлэн яармаг Монголын Үндэсний Худалдаа аж үйлдвэрийн их танхимд арваннэгдүгээр сарын 09-ний өдрийн 12.00-16.00 цагийн хооронд зохион байгуулагдана. 

Өнөөдрийн байдлаар Монгол Улсын хэмжээнд 50 орчим үндэсний томоохон хэмжээний аж ахуй нэг, байгууллагын 500 гаран  нээлттэй ажлын байр зарлагдах бөгөөд 15-34 насны ажил идэвхитэй хайж буй залуус хамрагдах боломжтой.

            Улаанбаатар хотын Ерөнхий менежерийн 2019 оны А/327 дугаар тушаалын хүрээнд Нийслэлийн хүн амын махны хангамжийг нэмэгдүүлэх, үнийн тогтвортой байдлыг хангах зорилгоор зохион байгуулсан “махны өргөтгөсөн худалдаа”-г 17-р хорооны 30-р байрны өмнөх талбай, асарт 2019 оны 10 дугаар сарын 30-наас 11 дүгээр сарын 03-ны өдрүүдэд зохион байгууллаа.

             Нийслэлийн Засаг даргаас бүх дүүргүүдэд айл өрхүүдийн пийшин, зуух, яндангийн аюулгүй байдлыг шалгах, сайжруулсан түлшний зөв хэрэглээтэй холбоотой шаардлагатай зөвлөмж, мэдээ мэдээллийг 10 дугаар сарын 28-наас 11 дүгээр сарын 03-ны өдөр хүртэл айл өрхүүдэд биечлэн хүргэх үүрэг өгсний дагуу СХД-ийн албан хаагчид ажиллаж байна.

Ажлын явц  11 дүгээр сарын 02-ны байдлаар 72.1 хувьтай байна. Дүүргийн Тамгын газарт 24 цагийн штаб ажиллаж холбогдох мэдээллийг авч байгаа юм.

 

СХД-ийн хэмжээнд сайжруулсан түлш худалдаалах 123 цэг байгаа ч иргэд цэгийн тоог нэмэгдүүлэхийг хүссэний дагуу дахин 28 цэг байгуулах шаардлагатай юм байна. Дүүргийн хэмжээнд 58 цэгт сайжруулсан түлшний савалгаа хийгдэж байгаа бөгөөд түлш савлаж байгаа иргэдэд жин, маск, бээлийгээр хангаж хөдөлмөрийн аюулгүй байдлыг ханган ажиллахыг анхаарууллаа. 

          Дүүргийн Онцгой комиссын 10 дугаар хурлаар дүүргийн шуурхай штабын ажлын явц, хороодын ажлын явц болон сайжруулсан түлш түгээлт, айл өрхийн галлагааны аюулгүй байдлын талаарх мэдээлэл хийлээ.

          Өнөөдрийн байдлаар дүүргийн хэмжээнд сайжруулсан түлшний 51.300 цахим карт тараагдсан.

10 сарын 23-наас 30-ны хооронд 96.6 тонн түүхий нүүрс илрүүлж, 51.2 тонныг битүүмжилж, үлдсэн тонныг битүүмжлэхээр ажиллаж байна.